काठमाडौंमा ग्यास सिलिन्डर पड्किँदा ११ जना घाइते

टुडेपाटी-
काठमाडौं, असोज २९ गते ।

काठमाडौंमा एउटा घरमा बिहीबार दिउँसो एलपीजी ग्यास सिलिन्डर पड्किँदा ११ जना घाइते भएका छन् ।

सोह्रखुट्टेस्थित फलफूल चोकमा स्थानीय निरकुमारी क्षेत्रीको चारतले घरमा ग्यास सिलिन्डर लिक भई विस्फोट हुँदा ११ जना घाइते भएको काठमाडौं प्रहरी परिसरका प्रवक्ता एसपी सोमेन्द्रसिंह राठौरले जानकारी दिए । घाइतेहरुको मनमोहन र पिपल्स अस्पतालमा उपचार भइरहेको एसपी राठौरले बताए ।

ग्यास विस्फोटपछि आगलागी भएको थियो । प्रहरी र दमकलले आगो निभाइसकेको छ । विस्फोटबाट घरका झ्यालढोकामा रहेका सिसाहरु फुटेका छन् भने नजिकमा रहेका अन्य घरमा पनि सामान्य क्षति पुगेको छ ।

क्षतिको विस्तृत विवरण आउन बाँकी रहेको प्रहरीले बताएको छ ।