वडाध्यक्षले एकल महिलाको कागजात च्यातेको आरोप

टुडेपाटी-
महोत्तरी, मंसिर १ गते ।

एक एकल महिलाले गौशाला नगरपालिका वडा नं. १२ का वडाध्यक्ष कुशेश्वर सिंहले एकल आफ्नो सिफारिस कागजात च्यातेको आरोप लगाएकी छन् ।

गौशाला नगरपालिका १२ परडियाका स्वर्गीय कैलाश राउतकी श्रीमती बिन्दा देवी राउतले वडाध्यक्ष सिंहमाथि यस्तो आरोप लगाएकी हुन् । बिन्दाकी श्रीमानको केही वर्षअघि हात्तीको आक्रमणबाट मृत्यु भएको थियो ।

राज्यबाट उनले एक्ल महिला भत्ता सुविधा पाउने गरेकी छन् । पछिल्लो समय उनको भत्ता बैंकले रोकेको छ । उनले सोही विषयमा पुराना कागजात लिएर वडाध्यक्ष सिंह समक्ष पुगेकी थिइन् । सो कागजात च्यातिदिएको पीडित महिलाको आरोप छ । अब वडाकार्यालयबाट दिएको कार्ड बैंकमा पेश गर्नुपर्ने प्रावधान रहेको छ ।

यता वडाध्यक्ष सिंहले एकल महिलाले आफूमाथि लगाएको आरोप झुटो रहेको दावी गरेका छन् । उनले तीनवटा कागजात त्यसमा संलग्न गरी स्टीज गरिएको र स्टीज उप्काउने बेला माथि रहेको कागजात थोरै च्यातिएको बताए ।
‘मैले कागजात किन च्यातनु ? च्यातनै थियो भने बीचबाटै तीनवटै च्याति दिन्थे नि । कागजात हेर्नुस् त्यहाँ स्टिज उप्काउने बेला छेउमा थोरै च्यातिएको प्रष्ट देखिन्छ’, वडाध्यक्ष सिंहले टुडेपाटीसंग भने ‘किन हो यसरी मेरो बदनाम हुने गरी आरोप लगाएको बुझ्नै गाह्रो भयो ।’