मधेश सरकारको कामप्रति सत्ता गठबन्धन नै असन्तुष्ट

टुडेपाटी-
जनकपुरधाम, कार्तिक २९ गते ।

मधेश प्रदेशमा सत्तारुढ गठबन्धनले जनमत पार्टी नेतृत्वको सरकारको कामप्रति असन्तुष्ट रहेको छ । बिहीबार बसेको सत्ता गठबन्धनको बैठकमा सतिशकुमार सिंह नेतृत्वको सरकारले बजेट खर्च गर्न नसकेको र जनतामा सन्तोषजनक काम देखाउन नसकेको भन्दै आलोचना भएको लोसपाका उपनेता उपेन्द्र महतोले जानकारी दिए।

उनका अनुसार, मुख्यमन्त्री, मन्त्री र गठबन्धनका नेताहरू बीच बजेट खर्चमा ढिलाइ र सरकारको कामलाई प्रभावकारी बनाउन कसरी अघि बढ्ने भन्ने विषयमा थप छलफल गर्ने सहमति भएको छ।

जनमत पार्टीका संसदीय दलका नेता महेश प्रसाद यादवले सरकार सुस्त रहेको, बजेट खर्च गर्न नसकेको र जनतामा निराशा छाएको बताए। ‘काम गर्न नसकेकाले जनतामा सरकारप्रति निकै निराशा, गुनासो, विगतको सरकार भन्दा पनि खतम छन् भन्ने टिप्पणी र नेतृत्वकर्ता दलको हैसियतले बदनामी हुन थालेपछि जनमत संसदीय दलको आह्वानमै गठबन्धनको बैठक बसेको थियो’, उनले भने ।

प्रदेश बजेट सूचना प्रणाली (पीएलएमबीआईएस) नखोलिएकाले बजेट खर्चमा समस्या भएको र यसलाई तत्काल खोल्ने निर्णय भएको पनि उनले जानकारी दिए। बैठकमा कामलाई प्रभावकारी बनाउन गठबन्धन दलहरूबीच नियमित बैठक बस्नुपर्ने विषयमा पनि छलफल भएको थियो ।

नेता यादवका अनुसार यो बैठक जनमत पार्टीका अध्यक्ष डा. सीके राउतको सल्लाहमा आयोजना गरिएको थियो । बैठकमा नेपाली कांग्रेसका नेता कृष्णप्रसाद यादव, एमाले नेता एवं भौतिक पूर्वाधार विकास मन्त्री सरोजकुमार यादव, र जनमत पार्टीका प्रदेश सांसद सञ्जय यादव सहभागी थिए।