सप्तरीमा बैंकका कर्मचारीसहित थप २५ जनामा कोरोना पुष्टि

शुभ नारायण यादव-
सप्तरी, असोज २५ गते ।

राजविराजस्थित राष्ट्रिय बाणिज्य बैंकका १३ जना कर्मचारीसहित थप २५ जनामा कोरोना संक्रमण पुष्टि भएको छ ।

राजविराजस्थित गजेन्द्र नारायण सिंह अस्पतालको कोभिड–१९ प्रयोगशालामा गरिएको स्वाब परीक्षणको रिपोर्ट अनुसार बैंकका १३ जना कर्मचारी, रुपनी गाउँपालिकाका ११ जना र राजविराज नगरपालिकाका एक जना गरी २५ जनामा कोरोना पुष्टि भएकोे हो ।

राष्ट्रिय बाणिज्य बैंक लिमिटेड शाखा राजविराजमा कार्यरत सप्तरीको राजविराज नगरपालिका वार्ड नम्बर १ का २३ वर्षीया महिला, सोही वार्डका उमेर नखुलेका पुरुष, ४० वर्षीय पुरुष, २३ वर्षीय पुरुष, उमेर उल्लेख नभएको महिला, डाक्नेश्वरी नगरपालिका ९ का १२ वर्षीय पुरुष, ३२ वर्षीय पुरुष, वार्ड नम्बर ७ का २४ वर्षीय पुरुष, ३५ वर्षीय पुरुष, विष्णुपुर गाउँपालिका ७ का २२ वर्षीय पुरुष, रुपनी गाउँपालिका ६ का ३८ वर्षीय पुरुष, मोरग जिल्लाका ३१ वर्षीय पुरुष, र उदयपुरको ३१ वर्षीय पुरुषमा कोरोना संक्रमण पाइएको जिल्ला स्वास्थ्य कार्यालय सप्तरीले जनाएको छ ।

त्यस्तै, रुपनी गाउँपालिका वार्ड नम्बर १ का ३१ वर्षीया महिला, ४६ वर्षीय पुरुष, ४३ वर्षीय पुरुष, ४८ वर्षीय पुरुष, २२ वर्षीय पुरुष, २४ वर्षीया महिला, ४० वर्षीया महिला, ३० वर्षीय पुरुष, २३ वर्षीय पुरुष, वार्ड नम्बर ४ का २४ वर्षीय पुरुष, ४७ वर्षीय पुरुष, छ वर्षीया महिला र राजविराज नगरपालिका वार्ड नम्बर ७ का ३८ वर्षीय पुरुषमा कोरोना संक्रमण भेटिएको स्वास्थ्य कार्यालय सप्तरीका निमित्त प्रमुख दुनियालाल यादवले जानकारी दिए ।

यससँगै सप्तरीमा कूल संक्रमितको संख्या एक हजार ३८७ पुगेको छ भने एक हजार ११२ जना निको भएर घर फर्किसकेको छ । यस्तै, हालसम्म सप्तरीमा तीन महिलासहित २० जनाको मृत्यु भएको यादवले बताए ।