महोत्तरीको रातु नदीमा बेपत्ता भएका कापड १४ किलोमिटर दक्षिणमा मृत भेटिए

टुडेपाटी-
महोत्तरी, साउन ६ गते ।

महोत्तरीमा रातु खोलाले बगाएर बेपत्ता बनाएको भंगहा नगरपालिका ६ का ४० वर्षीय वरेन्द्र कापडको शव फेला परेको छ । रातु नदीले बेपत्ता बनाएपछि खोजतलासको क्रममा कापडको मृत्यु भएको अवस्थामा शव झण्डै १५ किलोमिटर दक्षिणमा भेटिएको प्रहरीले जनाएको छ ।

कापडको शव अपराहन्न ५ बजे महोत्तरीको बल्बा नगरपालिका ४ भगवतीपुर नजिक रातु खोला किनारमा भेटिएको महोत्तरीका प्रहरी नायव उपरीक्षक प्रकाश विष्टले जानकारी दिए । उनका अनुसार खोजतलासको क्रममा बगाएको ठाउँबाट झण्डै १४।१५ किलोमिटर दक्षिणमा कापडको शव भेटिएको हो ।

अहिले शव फेला परेको ठाउँमा जिल्ला प्रहरीको टोली पुगेर मुचुल्का गरी शवलाई पोस्टमार्टमका लागि जिल्ला अस्पताल जलेश्वर लैजाने तयारी भइरहेको उनले बताए ।
मंगलबार बिहान १० बजे जनकपुरबाट घर संग्रामपुर जाने क्रममा साईकल लिएर खोला तर्न खोज्दा उनलाई बाढीले बगाएर बेपत्ता बनाएको थियो ।