इजरायल र हमासबी युद्धविराम, १५ महिनाको युद्धमा ४६ हजार मानिसले ज्यान गुमाए

एजेन्सी-
जनकपुरधाम, माघ ३ गते ।

१५ महिनासम्म चलेको रक्तपातपूर्ण संघर्षमा ४६ हजार मानिसको ज्यान गुमेपछि इजरायल र हमास युद्धविराम गर्न सहमत भएका छन्। ६ साता लामो यो युद्धविराम आइतबारदेखि कार्यान्वयनमा आउनेछ।

सम्झौताको पहिलो चरणमा इजरायलमा रहेका केही बन्धकहरूलाई हमासले रिहा गर्नेछ। त्यसको बदलामा इजरायलले प्यालेस्टिनी बन्धकहरूलाई मुक्त गर्नेछ। साथै, इजरायली सेना युद्ध क्षेत्रबाट फिर्ता हुनेछ। युद्धविरामको पालना सुनिश्चित गर्न यो अवधिमा वार्ता पनि जारी रहनेछ।

इजरायली प्रधानमन्त्री बेन्जामिन नेतन्याहुको लिकुड पार्टीका केही सदस्य र वामपन्थी नेताहरूले युद्धविरामको विरोध गरे पनि संयुक्त राष्ट्रसंघ, अमेरिका, कतार, र इजिप्टजस्ता देशहरूले यो सम्झौताको स्वागत गरेका छन्।

सम्झौताले लाखौं विस्थापित गाजावासीलाई आफ्ना घर फर्कने अनुमति दिनेछ भने बन्धकहरूको सुरक्षित रिहाइको आशा जगाएको छ।

इजरायल र हमासबीचको यो युद्ध ७ अक्टोबर २०२३ मा सुरु भएको थियो। हमास लडाकुहरू गाजाबाट इजरायलमा प्रवेश गरेर आक्रमण गर्दा १० नेपाली विद्यार्थी सहित १,२०० मानिसको ज्यान गएको थियो। हमासले नेपालका विपिन जोशीसहित २५० जनालाई बन्धक बनाएको थियो।

यो आक्रमणपछि इजरायलले हमासविरुद्ध हवाई र स्थल दुवैतर्फबाट जवाफी कारबाही सुरु गरेको थियो। १५ महिनासम्म चलेको यस संघर्षमा ४६ हजार मानिसले ज्यान गुमाएका छन्।

युद्धविरामको सहमतिले द्वन्द्वग्रस्त क्षेत्रमा शान्ति स्थापना र मानवीय राहत पु¥याउने आशा जागेको छ।