मधेश प्रदेशः स्रोत नखुलेको करिब ८ लाख रुपैयाँसहित दुई महिला पक्राउ

टुडेपाटी–
सप्तरी, असोज ३० गते ।

स्रोत नखुलेको करिब पौने ८ लाख रुपैयाँसहित सप्तरीमा दुई महिला पक्राउ परेका छन् ।

पक्राउ पर्नेमा सप्तरीकै अग्निसाईर कृष्णसवरण नगरपालिका २ बस्ने २७ वर्षीया सिमा भन्ने सागर कुमारी चौधरी र सिरहाको लहान नगरपालिका वडा नं. १ बस्ने २६ वर्षीया चन्दा चौधरी रहेको जिल्ला प्रहरी कार्यालय सप्तरीले जनाएको छ ।

सप्तरीका प्रहरी प्रवक्ता प्रहरी नायव उपरीक्षक ढुण्डीराज न्यौपानेका अनुसार पुर्व पश्चिम राजमार्ग स्थित रुपनी नगरपालिका १ खाडोपुलमा विशेष सुचनाको आधारमा दुबैजनालाई पक्राउ गरिएको हो ।

प्रहरीले प्र १–००–४८ प ३०९० नम्बरको स्कुटर चेकजाँच गर्दा स्कुटरको डिकीमा लेडिज झोला भित्र लुकाई छिपाई राखेको श्रोत नखुलेको ७ लाख ५० हजार र चालक सागर कुमारी चौधरीले लगाएकी ज्याकेटको खल्तिबाट ३६ हजार ५ सय रुपैयाँ गरि ७ लाख ८६ हजार ५ सय बरामद गरेको प्रवक्ता न्यौपानेले जनाए ।

यस सम्बन्धमा थप अनुसन्धान भइरहेको जिल्ला प्रहरी कार्यालय सप्तरीले जनाएको छ ।