सप्तरीमा छुट्टाछुट्टै घटनामा एकैदिन दुईजनाको मृत्यु

शुभनारायण यादव-
सप्तरी, वैशाख २५ गते ।

सप्तरीमा छुट्टाछुट्टै घटनामा परी दुई जनाको बिहीबार मृत्यु भएको छ । पूर्व पश्चिम लोकराजमार्ग अन्तर्गत सप्तरीको अग्निसाईर कृष्णासावरण गाउँपालिका २ सीतापुरमा बिहीबार बिहान सवारी दुर्घटनामा परी एक जनाको मृत्यु भएको हो ।

लोकराजमार्गमा पूर्वबाट पश्चिम तर्फ जादै गरेको गरेको ना.३ ख.६१२६ नम्बरको रोकी राखेको ट्रकमा सोही दिशातर्फ जादै गरेको स. ८ प. ५६२९ नम्बरको मोटरसाइकल अनियन्त्रित भई ट्रकमा ठोकिँदा मोटरसाइकल सवार एक जनाको मृत्यु भएको प्रहरीले जनाएको छ ।

दुर्घटनामा परी मोटरसाइकलमा सवार अग्निसाईर कृष्णसावरण गाउँपालिका ३ बस्ने ३६ वर्षीय तरुण सरदार र ३५ वर्षीय बिक्रम सरदारको टाउको लगायत शरीरको बिभिन्न भागमा गम्भीर चोट लाग्दा उपचारको लागि राजविराज स्थित गजेन्द्र नारायण सिंह अस्पताल ल्याउने क्रममा बिक्रम सरदारको बाटोमै मृत्यु भएको सप्तरीका प्रहरी नायव उपरीक्षक तिलक भारतीयले जानकारी दिए ।

यसैगरी, सप्तरीको राजविराज नगरपालिका २ शिव टोल बस्ने संजीव मण्डलको श्रीमती २५ वर्षीया बर्षा देवी मण्डलले आफ्नै घरको सुत्ने कोठाको सिलिङ पंखामा साडीको पासो लगाई झुण्डिएर आत्महत्या गरेका छन ।

झुण्डिएको अवस्थामा उनको श्रीमानले देखेपछि पासो काटेर उपचारको लागि राजविराजस्थित गजेन्द्र नारायण सिंह अस्पताल ल्याउने क्रममा उनको पनि बाटोमै मृत्यु भएको प्रहरीले डीएसपी भारतीले बताए ।