जङ्गली हात्तीको आक्रमणबाट सप्तरीमा महिलाको ज्यान गयो

शुभनारायण यादव-
सप्तरी, वैशाख २५ गते ।

सप्तरीको शम्भुनाथ नगरपालिका २ भलुवाहीमा जङ्गली हात्तीको आक्रमणमा परी एक महिलाको मृत्यु भएको छ ।
गएराती करिब एक बजेको समयमा आएको जङ्गली हात्तीले आक्रमण गर्दा स्थानीय ३८ वर्षीया जानकी मगरको मृत्यु भएको जिल्ला प्रहरी कार्यालय सप्तरीले जनाएको छ ।

घरमा हात्ती आएको थाहा पाएपछि श्रीमान पेसल मगरसँग घरबाट बाहिर भाग्ने क्रममा हात्तीको आक्रमणमा परी घाइते मगरको उपचारका लागि राजविराज स्थित गजेन्द्र नारायण सिंह अस्पताल पु¥याएको थियो । अस्पतालले उनलाई तत्कालै मृत घोषणा गरेको सप्तरीका प्रहरी प्रवक्ता प्रहरी नायब उपरीक्षक तिलक भारतीले जानकारी दिनुभयो ।

Sponsored

मृतक जानकीको तीन छोरी र १४ वर्षका एक छोरा छन् । आमाको मृत्यु भएपछि ती छोराछोरीको अवस्थामा बिचल्ली भएको छ ।