धनुषामा ट्रकको ठक्करबाट मोटरसाइकल चालकको मृत्यु

टुडेपाटी-
जनकपुरधाम, चैत २२ गते ।

धनुषामा ट्रकले मोटरसाइकलमा ठक्कर दिँदा एकजनाको मृत्यु भएको छ । मृत्यु हुनेमा मिथिला नगरपालिका–३ हरिहरपुरका मोटरसाइकल चालक अन्दाजी २२ वर्षीय युवराज महतो रहेका छन् ।

बुधबार साँझ पूर्वपश्चिम राजमार्ग अन्तर्गत धनुषाको मिथिला नगरपालिका–३ हरिहरपुरस्थित औरही पुलमा पूर्वबाट पश्चिमतर्फ आउँदै गरेको प्रदेश ०१–०२–००१ ख ८७७३ नम्बरको ट्रकले प्रदेश २–०२–००२ प ८३०४ नम्बरको मोटरसाईकललाई ठक्कर दिएको हो ।

घटना विषयमा थप अनुसन्धान भइरहेको धनुषाका प्रहरी प्रवक्ता वेदप्रसाद गौतमले जानकारी दिए ।

दुर्घटनापश्चात स्थानीयले पूर्वपश्चिम राजमार्ग पूर्ण रुपले अवरुद्ध गरेका छन् ।