मधेश प्रदेश : करेन्ट लागेर एकजनाको मृत्यु, एकजना घाइते

टुडेपाटी-
वीरगन्ज, कार्तिक २१ गते ।

करेन्ट लगेर वीरगञ्जमा एक जनाको मृत्यु भएको छ, एक जना घाइते भएका छन् ।

पर्साको बहुदरमाई नगरपालिका–४ बहुअरी पिडारी बस्ने ४५ वर्षीय नागेन्द्रप्रसाद यादवको करेन्ट लागेर मृत्यु भएको हो । यस्तै, वीरगञ्ज–३२ चोर्नी बस्ने १९ वर्षीय सिकेन्द्र प्रसाद यादव घाइते भएका हुन् ।

वीरगञ्ज–२२ ड्राइपोर्ट परवानीपुर सडकखण्डको जगरनाथपुरस्थित क्वालिटी धर्मकाटा छेउमा ना ८ ख ३८४९ नम्बको टिपरले माटो खसाएर ब्याक गर्ने क्रममा विद्युतको तार चुडिएको थियो ।

चुडिएको तारले ड्राइपोट्रबाट परवानीपुर तर्फ जाँदै गरेको ना ४६ प ५५४२ नम्बरको मोटरसाइकलमा सवार उनीहरुलाई करेन्ट लागेको थियो ।

करेन्ट लागेर घाइते भएका दुवै जनालाई उपचारका लागि नारायणी अस्पताल वीरगञ्ज ल्याउने क्रममा नागेन्द्रको बाटोमै मृत्यु भएको जिल्ला प्रहरी कार्यालय पर्साले जनाएको छ ।