जनकपुरधामबाट १३५ वृद्ध–वृद्धालाई लिएर अयोध्याको धार्मिक यात्रामा निस्के वडाध्यक्ष साह

टुडेपाटी–
जनकपुरधाम, साउन २९ गते ।

जनकपुरधाम उपमहानगरपालिका २ का वडाध्यक्ष शिवकुमार साहले १३५ जना वृद्ध–वृद्धालाई लिएर राम जन्मभूमी अयोध्याका लागि निस्केका हुन् ।

आइतबारदेखि धार्मिक यात्रा प्रारम्भ भएको हो ।

वडाध्यक्ष साहले आफ्ना वडाका १३५ जना जेष्ठ नागरिकहरुलाई लिएर भारतको अयोध्या, बनारस सहितका तिर्थधामका लागि प्रस्थान गरेका हुन् ।

उक्त अवसरमा विदाई गर्न पुगेको नेपाली कांग्रेसका नेता विमलेन्द्र निधिले मंसिर ४ मा हुने प्रतिनिधिसभाको निर्वाचनमा धनुषा ३ बाट उम्मेदवारी दिने बताए ।

उनले लोकतान्त्रिक शक्तिहरु एकजुट भई मिलेर आगामी निर्वाचनमा जानुको विकल्प नरहेकोसमेत बताए । नेता निधिले सत्ता गठबन्धनको दलमा नरहेका लोकतान्त्रिक समाजवादी पार्टीलाई पनि पाँच दलीय गठबन्धनमा सहभागी गराई सरकारमा समावेश गर्नुपर्ने बताए ।

नेता निधिले लोसपाका वरिष्ठ नेता राजेन्द्र महतोलाई आफुले स्वयं कुरा गरेर निर्वाचनमा सँगै जानका लागि भनेको बताए । उनले भने, ‘लोसपालाई गठबन्धनमा ल्याउन पार्टी सभापति शेरबहादुर देउवाले विभिन्न चरणमा छलफल गरेका छन् ।’

धनुषा ३ मा ०७४ को प्रतिनिधिसभाको निर्वाचनमा तत्कालिन राष्ट्रिय जनता पार्टी नेपालको तर्फबाट राजेन्द्र महतो निर्वाचित भएका थिए । उनले नेपाली कांग्रेसका नेता निधिलाई उनकै निर्वाचन क्षेत्रमा पराजित गरेका थिए ।