मधेश प्रदेश : ३०१९ एम्पुल लागूऔषधसहित युवक पक्राउ

टुडेपाटी-
वीरगञ्ज, साउन ७ गते ।

पर्सा प्रहरीले ठूलो मात्रामा लागुऔषधसहित एकजना युवक र उनको कारलाई वीरगञ्जबाट नियन्त्रणमा लिएको छ ।

शुक्रबार साँझ पौने ९ बजेको समयमा वीरगञ्ज महानगरपालिका १६ रजतजयन्ती चोकस्थित सडकबाट वडानम्बर १० का ३१ वर्षीय अनिल कुमारलाई पक्राउ गरेको हो ।

विशेष सूचनाका आधारमा जिल्ला प्रहरी कार्यालयबाट खटिएको प्रहरी टोलीले बीआर०वाई ८२०१ नम्बरको कारसहित अनिललाई नियन्त्रणमा लिएको प्रहरीले जनाएको छ ।

चेकजाँचका क्रममा उक्त कारको सिटमुनि फल्स बटम बनाई कागजले बेरी राखेको अवस्थामा लागुऔषध भेटिएको थियो ।

प्रहरीले कारबाट फेनारगन ८८६ एम्पुल, डाइजेपाम ११५५ एम्पुल र नुरफिन ९७८ एम्पुल गरी जम्मा ३०१९ एम्पुल तथा नाईट्राभेट १७८५ ट्याब्लेट बरामद गरेको जनाएको छ ।

पक्राउ परेका अनिललाई लागुऔषध कसुरमा थप अनुसन्धान सुरु गरिएको प्रहरीले जनाएको छ ।