सप्तरीमा डुबेर एक वृद्धको मृत्यु

शुभ नारायण यादव–
सप्तरी, असार ३२ गते ।

सप्तरीको सप्तकोसी नगरपालिका ५ स्थित चन्द्रनहरमा पानीमा डुबेर एक वृद्धको मृत्यु भएको छ ।

मृत्यु हुनेमा सप्तरीको सप्तकोसी नगरपालिका ४ का ७० वर्षीय लक्ष्मी सदा रहेको प्रहरीले जनाएका छन् ।

स्थानीय पत्रकार दिपेन्द्र यादवका अनुसार शुक्रबार बेलुकाको समयमा गाई चराएर घर फर्किने क्रममा गाई फर्काउन नहरमा पसेका वृद्ध सदा अचानक डुब्न पुगेका थिए । उनी डुबेको खबर गाउँलेले अबेर राती थाहा पाए लगतै स्थानिय प्रहरीलाई खबर गरी उद्घार कार्यमा लागेका थिए ।

प्रहरीले नहरको पानी बन्द गराइ खोजी कार्यमा लाग्दा शनिवार बिहान सदाको शव चन्द्रनहर भन्दा करिब तीन किलोमिटर दक्षिण बगाएर लगेको अवस्थामा फेला परेको प्रहरी चौकी फत्तेपुरले जनाएको छ ।

मृतक सदाको शव पोष्टमार्टमका लागि गजेन्द्र नारायण सिंह अस्पताल राजबिराज लगिएको प्रहरीले जनाएको छ ।