मधेश प्रदेश : गाँजा सहित दुईजना प्रहरीको फन्दामा

टुडेपाटी–
वीरगञ्ज, बैशाख १८ गते ।

पर्सामा मालबाहक ट्रकबाट लागूऔषध गाँजा सहित दुईजना पक्राउ परेका छन् ।

प्रहरीले ट्रकका चालक र सहचालकलाई पक्राउ गरेको हो ।

मकवानपुरबाट पर्साको भेगतर्फ जाँदै गरेको ना ३ ख ६३८४ नम्बरको मिनी ट्रक , वीरगन्ज महानगरपालिका वडा नम्बर ३० लालपर्सास्थित लिटिल फलावर स्कुल नजिकै प्रहरीले रोकेर चेकजाँच गर्दा ट्रकमा दुईवटा बोराभित्र लुकाएर राखिएको ६ पोकामा रहेको ५३ केजी गाजा बरामद भएको पर्साका प्रहरी प्रवक्ता प्रहरी नायव उपरीक्षक ओमप्रकाश खनालले जानकारी दिए ।

गाँजा र मिनी ट्रकसँगै चालक मकवानपुरको हेटौडा ११ का ४५ वर्षीय पूर्णबहादुर मोक्तान र सहचालक हेटौडा ४ का राज भुलनलाई नियन्त्रणमा लिइएको खनालले बताए ।

खनालका अनुसार , मकवानपुरको ग्रामीण भेगबाट ल्याइएको गाँजा, पर्साको ग्रामीण भेगका नाकाहुँदै भारत तस्करी गरेर लैजाने क्रममा प्रहरीले बरामद गरेको हो ।