मधेश प्रदेश : मोटरसाइकल दुर्घटनामा आमा–छोरीको मृत्यु

टुडेपाटी–
पर्सा, माघ २४ गते ।

मोटरसाईकल दुर्घटनामा परेर पर्सामा आमा–छोरीको मृत्यु भएको छ ।

ट्याक्टरले मोटरसाइकललाई ठक्कर दिँदा जिराभवानी गाँउपालिका–४ भवानीपुरकी ३० वर्षीया विद्यादेवी थारू र उनकी ४ वर्षीया छोरी अन्या कुमारीको मृत्यु भएको जिल्ला प्रहरी कार्यालय पर्साका प्रहरी उपरीक्षक रमेश बस्नेतले जानकारी दिए।

आइतबार सुपौलीबाट पाण्डेपुरतर्फ जाँदै गरेको ना ४ त ८१४६ नम्बरको ट्रयाक्टरले सोही तर्फ जादैँ गरेको बा ५५ प ६५२८ नम्बरको मोटरसाइकलाई भवानीपुरमा ठक्कर जिल्ला प्रहरी कार्यालय पर्साले जनाएको छ ।

दुर्घटनामा परेर छोरीको घटनास्थलमै मृत्यु भएको हो । आमाको भने उपचारको क्रममा आइतवार राति वीरगन्जस्थित नेशनल मेडिकल कलेजमा मृत्यु भएको प्रहरीले जनाएको छ।

दुर्घटनामा परेर मोटरसाइकल चालक विद्यादेवीका जेठाजु अनिल महतो सामान्य घाइते भएका छन्।

ट्रयाक्टर चालक भने प्रहरीको नियन्त्रणमा रहेको छ ।