प्रदेश २ : मोटरसाइकल दुर्घटनामा दुईजनाको मृत्यु

टुडेपाटी-
बारा, कार्तिक २८ गते ।

सवारी दुर्घटनामा परी बारामा दुई जनाको मृत्यु भएको छ । मृत्यु हुनेमा कोल्हबी नगरपालिका वडा नं.१ कोल्हबी टोलका २० वर्षीय सागर चौधरी र १९ वर्षीय सुशील चौधरी रहेको बारा प्रहरीले जनाएको छ ।

गएराति साढे ८ बजे बारा कोल्हबी नगरपालिका-१ चौकमा कोल्हबीबाट श्रीपुरतर्फ जाँदै गरेको ना.४२प ८०२३ न.को मोटरसाइकल अनियन्त्रित भई बटौलिया स्वास्थ्य चौकीको भवनमा ठोक्किएको थियो ।

दुर्घटनामा २० वर्षीय सागर चौधरी, १९ वर्षीय सुशील चौधरी र २० वर्षीय अशोक चौधरी गम्भीर घाइते भएका थिए । उनीहरूलाई उपचारका लागि वीरगञ्जको नारायणी अस्पताल पठाइएको थियो ।

बाराका प्रहरी प्रवक्ता प्रहरी नायव उपरीक्षक गौतम मिश्रले टाउकोमा गम्भीर चोट लागेका सागर र सुशीलको उपचारको क्रममा मृत्यु भएको र अशोकको उपचार भइरहेको जानकारी दिए ।