रौतहटमा कार दुर्घटनामा मृत्यु भएका सबैको सनाखत

टुडेपाटी–
रौतहट, कार्तिक २८ गते ।

रौतहटमा कार दुर्घटनामा मृत्यु भएका चारै जनाको सनाखत भएको छ । शनिवार राति चन्द्रनिगाहपुर–गौर सडकखण्ड अन्तर्गत झुन्खुनवा चोक नजिक भारतीय नम्बर प्लेटको कार दुर्घटना भएको थियो ।

युके १२ सि २९०० नम्बरको भारतीय कार दुर्घटनामा भारत विहारका २५ वर्षीय दिनानाथ साह, ३० वर्षीय अरुण साह, २८ वर्षीय दिलिप महतो र २७ वर्षीय अमित महतो रहेको रौतहट प्रहरी प्रमुख प्रहरी उपरीक्षक विनोद घिमिरेले जानकारी दिए ।

कारण अनियन्त्रित भई सडक भन्दा २० मिटर छेउमै रहेको ठुलो खाडलमा खसेको थियो ।

कार दुर्घटना पश्चात तत्काल कारको सिसा फुटालेर ४ जनालाई निकाली उपचारको लागि जिल्ला अस्पताल गौरमा लगेपछि चिकित्सकले चारै जनाले मृत घोषणा गरेका थिए ।

मृतकहरुको आइडी कार्डको आधारमा पहिचानको लागि भारतीय प्रहरीलाई तस्वीर सहितको म्यासेज पठाएपछि उनीहरुको परिवारजन आएर सनाखत भएको भएको प्रहरी उपरीक्षक घिमिरेले जानकारी दिए ।

दुर्घटनामा मृत्यु भएका चारै जना रौतहटको देवाही गोनाही नगरपालिका वडा नं. ४ स्थित आफन्त नरेश साहको घरमा छठको प्रसाद पुर्याउन आएर घर फर्किँदै थिए ।