धनुषाबाट चोरीको मोटरसाइकलसहित दुई युवक प्रहरीको फन्दामा

नितेश यादव-
जनकपुरधाम, असोज १२ गते ।

धनुषामा चोरीको मोटरसाइकलसहित दुई युवक पक्राउ परेका छन् ।

धनुषाको हंसपुर नगरपालिका–६ सोनीगामाका १९ वर्षीय मम्ताज मन्सुरी र २० वर्षीय रमेशकुमार महरालाई पक्राउ गरेको इलाका प्रहरी कार्यालय ढल्केवरका प्रहरी निरीक्षक प्रदीप सुवेदीले जानकारी दिए ।

‘आज राति मोटरसाइकल चोरी भएको सूचना प्राप्त भयो’, उनले भने, ‘सोही सूचनाको आधारमा हाम्रो टोली विरेन्द्र बजार पुगेको थियो र हामी पक्राउ गर्न सफल भयौं ।’

दुवैजनालाई मंगलवार बिहान १० बजे धनुषाको गणेशमान चारनाथ नगरपालिकाको विरेन्द्रबजारस्थित रहेको स्थानीय वर्कसपमा विक्री गर्न खोजीरहेको अवस्थामा मोटरसाइकलसहित पक्राउ गरिएको सुवेदीले बताए ।

स्थानीय बेचन मुखियाको घरबाट दुवैले मंगलबार राति प्र.२–०२–००२प–००८५ नम्बरको मोटरसाइकल चोरी गरेको थियो ।

पक्राउ परेका दुवैजनालाई मोटरसाइकलसति चोरी मुद्दामा आवश्यक कारबाहीको लागि जिल्ला प्रहरी कार्यालय धनुषामा पठाइएको सुवेदीको भनाइ छ ।