बर्दिबासमा ट्रकले मोटरसाइकललाई ठक्कर दिँदा एकजनाको मृत्यु, एक गम्भीर घाइते

टुडेपाटी-
जनकपुरधाम, चैत ३१ गते ।

महोत्तरीको बर्दिबासमा ट्रकले मोटरसाइकललाई ठक्कर दिँदा एकजनाको मृत्यु भएको छ भने एकजना गम्भीर घाइते भएका छन् ।

सिन्धुलीबाट भिमानतर्फ जाँदै गरेको लु १ क ८४५० नम्बरको ट्रकले भिमानबाट बर्दिबासतर्फ आउँदै गरेको बा २ ग ९३३८ नम्बरको मोटरसाइकललाई ठक्कर दिँदा एकजनाको मृत्यु भएको र एकजना गम्भीर घाइते भएको इलाका प्रहरी कार्यालय बर्दिबास जनाएको छ ।

मंगलबार साँझ भएको दुर्घटनामा सुनसरीको कालेपोखरी गाउँपालिकाका ३० वर्षीय नरेन्द्र दुलालको मृत्यु भएको हो भने मोटरसाइकलको पछाडि सवार २७ वर्षीय केदार वास्तोला गम्भीर घाइते भएका छन् ।

घाइते वास्तोलाको बर्दिबासस्थित अस्पतालमा उपचार भइरहेको छ भने ठक्कर दिने ट्रक र चालक इलाका प्रहरी कार्यालय बर्दिबासको नियन्त्रणमा छन् ।