सिरहामा बोक्सी आरोपमा सासु सुदामादेवीलाई कुटपिट गरी हत्या गर्ने बुहारी पक्राउ

टुडेपाटी-
जनकपुरधाम, पुस १२ गते ।

बोक्सी आरोपमा सासुलाई श्रीमानसहित कुटपिट गरी हत्या गरेको आरोपमा बुहारी पक्राउ परेकी छन् । पक्राउ पर्नेमा सिरहाको कर्जन्हा नगरपालिका ३ की ३५ वर्षीया मन्जुदेवी साह छन् ।

गत कात्तिक ११ गते आफ्नै कान्छो छोरा रामअवतार साह र बुहारी मन्जुले बोक्सीको आरोप लगाएर कुटपिट गर्दा घाइते भएकी ८५ वर्षीया सुदामा देवीको कार्तिक १५ गते उपचारको क्रममा मृत्यु भएको थियो । कुटपिट गरी मलमुत्र खुवाउने प्रयास गरेकै दिन छोरा रामअवतारलाई प्रहरीले पक्राउ गरेको थियो भने मन्जुदेवी फरार भएका इिन् ।
फरार भएको दुई महिना पश्चात इलाका प्रहरी कार्यालय मिर्चेयाबाट खटिएको टोलीले मन्जुदेवीलाई कर्जन्हा ३ स्थित उनकै घरबाट आइतबार नियन्त्रणमा लिएको सिराहा प्रहरी प्रबक्ता शालिग्राम शर्माले जानकारी दिए । पक्राउ परेकी मन्जुलाई आवश्यक कारबाहीका लागि जिल्ला अदालतमा पेश गरिएको उनको भनाइ छ ।

Sponsored

कार्तिक ११ गते सुदामा देवीलाई छोरा र बुहारीले बोक्सी भन्दै कुटपिट गरी दिसा खुवाउन खोजेपछि प्रहरीले तत्कालै उद्धार गरेका थिए । छोरा र बुहारीको कुटाइबाट घाइते भएकी सुदामादेवीलाई उपचारका लागि जनकपुरधामस्थित प्रादेशिक अस्पताल लगिएको थियो । दुई दिनको उपचारपछि उनलाई घरमै ल्याइएको थियो । तर कात्तिक १५ गते उनको स्वास्थ्य पुनः बिग्रिएपछि सिराहा जिल्ला अस्पताल लग्ने क्रममा बाटोमा नै मृत्यु भएको थियो ।