महोत्तरीमा स्कुल बसबाट खसेर विद्यार्थीको मृत्यु

बाबु प्रेम यदुवंशी-
महोत्तरी, मंसिर २४ गते ।

महोत्तरीमा स्कुलको बसबाट खसेर एक विद्यार्थीको मृत्यु भएको छ । मृत्युु हुनेमा रामगोपालपुर नगरपालिका ५ मा सञ्चालित जानकी युगान्तर इंगलिस बोर्डिगं स्कुलमा कक्षा ६ मा पढ्ने विद्यार्थी १४ वर्षीय मोदसि सेक रहेको प्रहरीले जनाएको छ ।

बुधबार दिउँसो विद्यालयमा छुट्टी भएपछि विद्यार्थी पुर्याउन गोठबनौली तर्फ जाँदै गरेको बा ३ ख २३९७ नम्बरको बसबाट खसेर विद्यार्थीको घटनास्थलमै मृत्यु भएको हो ।

बसको मुख्य ढोका खुल्लै रहेको र मृतक विद्यार्थी ढोकानिर उभिरहेकोले चालक ब्रेक लगाउदा खसेर घटना स्थलमै मृत्युु भएको प्रहरीले जनाएको छ । घटनाको प्रकृति हेर्दा बसबाट खस्दा बसको पछाडीको चक्का शरिरमा चढेको र उनको मृत्युभएको आशंका गरिएको छ ।

घटना पश्चात भागिरहेका बस चालकलाई प्रहरीले स्थानीयको सहयोगमा पक्राउ गरेर इलाका प्रहरी कार्यालय रामगोपालपुरमा राखेको छ । घटनाबारे थप अनुसन्धान भइरहेको प्रहरीले जनाएको छ ।