दशैँ भत्ता नदिएको भन्दै वीर अस्पतालका १६ जना डाक्टरले दिए सामुहिक राजीनामा

टुडेपाटी

काठमाडौँ, कार्तिक १९ गते ।

वीर अस्पतालमा कार्यरत १६ जना डाक्टरले सामुहिक राजीनामा दिएका छन् । इमर्जेन्सी विभागमा कार्यरत उनीहरले निरन्तर पेस गर्दा पनि आफ्ना मागहरू पूरा नभएको भन्दै राजीनामा दिएका हुन् ।

राजीनामा दिएका चिकित्सकहरुले अस्पतालका निर्देशक डा. केदार सेन्चुरीसमक्ष राजीनामा बुझाएका छन् ।

पत्रमा अस्पतालले दसैंको भत्ता नदिएको, तलब दिँदा एकदिनको कटौती गरिएको, हप्ताको ९६ घण्टा काममा खटाइएको उल्लेख छ।

साथै अस्पतालले धम्की दिँदै विभिन्न काममा खटाएको चिकित्सकहरूको भनाइ छ। महामारीका बीच निरन्तर सेवामा खटिँदा पनि अस्पतालबाट हुने यस्तो व्यवहारले मनोबल गिरेको उनीहरूले बताएका छन्।

साथै, काममा आवश्यक पर्ने स्वास्थ्य सामग्री पनि अस्पतालले पर्याप्त उपलब्ध नगरेको उनीहरूको गुनासो छ।

राजीनामा दिने १६ जना नै आकस्मिक विभागमा खटिएका मेडिकल अधिकृत छन्।