महोत्तरीको रातु नदीमा एकजना बेपत्ता

रंजन भण्डारी-

महोत्तरी, साउन ६ गते ।

महोत्तरीमा रातु नदी तर्न खोजेका एक युवक बेपत्ता भएका छन । भंगहा नगरपालिका ६ संग्रामपुर निवासी करिव ३५ वर्षीय विरेन्द्र कापर बेपत्ता भएका हुन ।

भंगहा नगरपालिका १ कविलासा पछियारी टोल स्थित भगवतीपुर र कविलासाको बीचमा रहेको रातु नदीमा साइकल सहित उनी बेपत्ता भएपछि उनको खोजिकार्य भइरहेको छ । 

मंगलवार बिहान साईकल घाँटीमा अड्काएर नदी तर्न खोज्दा पानीको वेगले उनलाई डुवाएर छेउमै रहेको ठुलो खाल्डो भित्र लगेको प्रत्यक्षदर्शीहरुले बताएका छन् ।

अझै उनको उद्धार गर्न सक्ने आशा सहित सयाै‌ं मानिस उनको खोजीमा लागेको पैरवी मञ्च नामक संस्थाका भोलेन्टियर सुजित कुमार मण्डलले बताए ।