प्रदेश २ : महिलाको कपाल काटी गाउँ डुलाउने देवर सहित चार जना पक्राउ

टुडेपाटी-

पर्सा, साउन १ गते ।

पर्साको छिपहरमाई गाउँपालिका ३ जयमंगलापुरमा एक महिलाको कपाल काटी गाउँ डुलाउने चार जनालाई प्रहरीले पक्राउ गरेको छ।

२४ वर्षीया महिलाको कपाल काटेर गाउँ डुलाउने ती महिलाका देवर सहित चार जनालाई प्रहरीले बिहीवार पक्राउ गरेको हो ।

खराब चरित्र भएको भन्दै उनकै देवर तथा छिमेकीहरू मिलेर अमानवीय व्यवहार गरेको पर्सा प्रहरीका प्रवक्ता डिएसपी मनोजित कुँवरले बताए।

प्रहरीले यस घटनामा संलग्न अन्यको पनि खोजी गरिरहेको उनले बताए।

जाहेरी आइसकेपछि घटनामा कसको संलग्नता रहेको भन्ने खुल्ने र सोही अनुसार कार्वाही प्रक्रिया अघि बढाउने उनले बताए ।
उनीहरूविरूद्ध प्रहरीले अपमानजनक वा अमानवीय व्यवहारको मुद्दा चलाउने तयारी गरेको छ। उजुरी नपरेकोले प्रहरीले उनिहरूको नाम भने खुलाउन चाहेनन्।