सिरहामा सशस्त्र प्रहरीका जवान नहरमा डुबेको अवस्थामा मृत फेला

टुडेपाटी-
सिरहा, असार १६ गते ।

सिरहामा नहरमा डुबेर सशस्त्र प्रहरी बलका एक जवान मृत अवस्थामा फेला परेका छन् ।

सिरहाको सिरहा नगरपालिका–१४ खिरौनास्थित सशस्त्र पोष्ट माडर सिरहामा कार्यरत २३ वर्षीय सशस्त्र प्रहरी जवान मनोहर कुमार यादव नहरमा डुबेको अवस्थामा फेला परेको प्रहरीले जनाएको छ ।

जिल्ला प्रहरी कार्यालय, सिरहाका प्रवक्ता डीएसपी विनोद घिमिरेका अनुसार घटना शंकास्पद देखिएको छ । थप अनुसन्धान भइरहेको उनले बताए ।

यादवको शव लहानस्थित सरकारी अस्पतालमा पोष्टमार्टमको लागि पठाइएको र रिपोर्ट आएपछि मात्रै घटनाबारे भन्न सकिने उनको भनाइ छ ।

उनी महोत्तरीको सोनमा गाउँपालिका–३ का बासिन्दा हुन् । सशस्त्र प्रहरीको जागिरमा आएको उनको २ वर्ष पूरा भएको छ ।