कार दुर्घटनामा पत्रकार कृष्ण बाबुको निधन

टुडेपाटी

बुटबल, असार १४ गते ।

कार दुर्घटनामा पत्रकार कृष्ण पाण्डे (बाबु) को निधन भएको छ।बुटवलमा क्रियाशिल न्यूज २४ टेलिभिजनमा कार्यरत उनको गएराति निधन भएको हो ।

बुटवल–भैरहवा सडक खण्डको तिलोत्तमा–१ ड्राइभर टोलमा भएको कार दुर्घटनामा ३० बर्षीय पाण्डेको ज्यान गएको प्रहरीले जनाएको छ।

बुटवलदेखि आफ्नो घर ड्राइभरटोलतर्फ आउँदै गर्दा बा ७ च ६९५९ नम्बरको कार दुर्घटना भएको थियो । कार उनी आफैले चलाएको प्रहरीको भनाई छ। घाईते पाण्डेलाई बुटवलको चौराहा अस्पतालमा उपचारका लागि लगिएकोमा उपचारकै क्रममा राती करिब १ बजे अस्पतालमा ज्यान गएको हो।

प्रहरीका अनुसार सडक किरानाको फलामे बारमा एक्कासी ठोक्कीन पुग्दा दुर्घटना भएको थियो। पोष्टमार्टमका लागि शवलाई अहिले लुम्बिनी प्रादेशीक अस्पतालमा राखिएको इलाका प्रहरी कार्यालय बुटवलले जानकारी दिएको छ।

सञ्चार क्षेत्रमा आवद्ध कृष्ण पाण्डे कलाकार समेत हुन्। उनि पावर न्यूज अनलाइन नेपालका सञ्चालक समेत रहेका थिए ।