जनपुरका थप ५ हस्पिटलमा मधेश सरकारको छड्के, दुईवटा बन्द गर्न निर्देशन
टुडेपाटी-
जनकपुरधाम, फागुन १ गते ।
मधेश सरकारले जनकपुरका थप पाँच निजी अस्पतालमा छड्के अनुगमन गरेको छ । मुख्यमन्त्री सतिशकुमार सिंह र स्वास्थ्य तथा जनसंख्या मन्त्री सत्रुधनप्रसाद सिंहको नेतृत्वमा भएको अनुगमनमा दुईवटा अस्पताल विना दर्ता सञ्चालनमा रहेको पाइएपछि बन्द गर्न निर्देशन दिइएको छ ।
जनकपुरको पीडारीचोकस्थित जनकपुर मधेश हस्पिटल र रामानन्दचोकस्थित जनकपुर गोल्डेन अस्पताल दर्ताविनै सञ्चालनमा रहेको पाइएको छ । मुख्यमन्त्री सिंहले दुबै अस्पताललाई विरामी व्यवस्थापन गरेर भोलि बिहान ११ बजेसम्म बन्द गर्न निर्देशन दिइएको स्वास्थ्य तथा जनसंख्या मन्त्रालयका निमित सचिव राजेश मिश्रले जानकारी दिए ।
सुरक्षा अस्पतालको अनुगमनमा नविकरण फेल भएको र सरसफाईमा कमी रहेको पाइएपछि सुधार गर्न र आवश्यक कागजातसहित भोलि मन्त्रालयमा उपस्थित हुन निर्देशन दिइएको छ ।
जिरोमाइलस्थित ज्योति आँखा अस्पतालका सञ्चालकलाई पनि कागजात लिएर भोलि मन्त्रालयमा हाजिर हुन भनिएको छ । हिरा हस्पिटलमा दर्ता कागजात दुरुस्त रहेपनि आकस्मिक कक्षमा ५ वटा बेड हुनुपर्नेमा ८ वटा रहेकाले तीनवटा बेड हटाउन निर्देशन दिइएको छ ।
यसअघि शनिबार २० वटा निजी अस्पतालमा अनुगमन गर्दा केही अस्पताल बन्द गरिए पनि केहीले अटेर गरेका थिए । अटेर गर्ने जनकपुर मोर्डन अस्पताल आजै बन्द गराइएको छ भने सञ्चालक रामभरोस महतोलाई नियन्त्रणमा लिएर प्रहरीलाई जिम्मा लगाइएको छ ।
