उपेन्द्रलाई नेतृत्व दिन खोजेपछि घोषणा नहुँदै मधेशी मोर्चामा खटपट

टुडेपाटी-
जनकपुरधाम, चैत २० गते ।

मधेश केन्द्रित सात दल मिलेर संयुक्त मोर्चा घोषणा गर्ने तयारी गरिरहेका बेला विवाद उत्पन्न भएको छ । बिहीबार दिउँसो ३ बजे ‘संघीय लोकतान्त्रिक मधेशी मोर्चा’ घोषणा गर्ने कार्यक्रम तय गरिएको भए पनि दलहरूबीच नेतृत्वको विषयलाई लिएर असहमति देखिएको छ ।

अशोक राई नेतृत्वको जसपाले मोर्चाको संरचना र नेतृत्वप्रति असन्तुष्टि जनाउँदै घोषणा सभामा सहभागी नहुने जनाएको छ । मोर्चाको नेतृत्व संसदीय दलको हैसियत अनुसार निर्धारण हुनुपर्ने जसपा र जनमत पार्टीको तर्क छ । तर, मोर्चाको नेतृत्व जसपा नेपालका अध्यक्ष उपेन्द्र यादवलाई दिन लागिएको भन्दै विवाद सिर्जना गरेको हो ।

जनमत पार्टीले पनि मोर्चाको गठन प्रक्रियामा असहमति जनाएको छ । प्रतिनिधिसभामा जसपाका ७, जनमतका ६ र जसपा नेपालका ५ सांसद छन् । तेस्रो स्थानमा रहेको जसपा नेपालले नेतृत्व लिनु उचित नभएको जसपा र जनमत पार्टीको धारणा छ ।

जसपाका महासचिव इस्तियाक राईले मोर्चाको उद्देश्य स्पष्ट नभएको बताए । ‘यो मोर्चा केवल नेतृत्वको लागि मात्र गठन गर्न खोजिएको देखिन्छ । पहिलो र दोस्रो स्थानमा रहेका दललाई पन्छाएर तेस्रो स्थानको दलले नेतृत्व लिनु स्वाभाविक होइन’ उनले भने ।

जसपाले सबैभन्दा ठूलो दलले नेतृत्व लिनुपर्ने वा आलोपालो प्रणाली अपनाउनुपर्ने प्रस्ताव राखेको थियो । तर, उक्त प्रस्ताव अस्वीकृत भएपछि जसपाले मोर्चामा सहभागी नहुने निर्णय गरेको हो ।

जनता प्रगतिशीलका नेता शिवजी यादवका अनुसार जसपालाई मोर्चामा आउन आग्रह गरिए पनि उनीहरूले शर्त राखेकाले सहमति जुट्न नसकेको हो । ‘जसपाले व्यापक छलफलको माग गरेको थियो । उचित छलफलबिना मोर्चा गठन गर्नु उपयुक्त हुँदैन भन्ने उनीहरूको धारणा छ’ यादवले भने ।

जनमत पार्टीका नेताहरूले मोर्चाको उद्देश्य नेताहरूलाई स्थापित गर्न मात्र भएको भन्दै असन्तुष्टि जनाएका छन् । एक शीर्ष नेताले भने, ‘सबैभन्दा ठूलो दललाई अवमूल्यन गरी अन्य दललाई माथिल्लो स्थान दिने हो भने हामी किन सो कार्यक्रममा जाने ?’
मोर्चामा जसपा, जनमत, जसपा नेपाल, नागरिक उन्मुक्ति, लोसपा, राष्ट्रिय मुक्ति पार्टी, जनता प्रगतिशील र तमलोपा गरी आठ दल छन् । राष्ट्रिय मुद्दामा साझा धारणा तय गर्न र सम्भावित पार्टी एकीकरणका लागि संवाद गर्न यी दलहरूले कार्यदल गठन गरेका थिए ।

संयुक्त कार्यदलमा जसपाबाट इस्तियाक राई, जनमतबाट शरद सिंह यादव, जसपा नेपालबाट मनीष सुमन, नागरिक उन्मुक्तिबाट गंगाराम चौधरी, लोसपाबाट लक्ष्मणलाल कर्ण, राष्ट्रिय मुक्ति पार्टी नेपालबाट केशव झा, जनता प्रगतिशीलबाट शिवजी यादव, र तमलोपाबाट ब्रजेश सिंह छन् ।
दलीय संवादका लागि प्रत्येक दलले आ–आफ्नो कार्यदल बनाइसकेको भए पनि नेतृत्वको विषयमा सहमति जुट्न नसक्दा मोर्चाको भविष्य अन्योलमा परेको छ ।