रौतहटमा १० लाख रुपैयाँसहित मोटरसाइकल बरामद

टुडेपाटी-

रौतहट, जेठ ८ गते ।

प्रहरीले रौतहटमा १० लाख नगद रुपैयाँसहित एउटा मोटरसाइकल बरामद गरेको छ ।

रौतहटको ईशनाथ नगरपालिका–९ स्थित नहरको बाटोमा बिहीबार बिहान ६ बजेर ३० मिनेटमा १० लाख रुपैयाँ नगद र ना५४ प २११६ नम्बरको मोटरसाइकल बरामद भएको जिल्ला प्रहरी कार्यालय रौतहटले जनाएको छ ।

उक्त मोटरसाइकलको अगाडि कपडाको झोलामा केही सामान लिएर औरैयाबाट कुडियातर्फ गइरहेका दुई जनालाई प्रहरीले चेकजाँच गर्न पिछा गर्ने क्रममा ती दुई जना व्यक्ति मोटरसाइकल र नगद छाडेर भागेका थिए । 

एक/एक हजारको ८ गड्डी  र पाँच/पाँचसयको ४ गड्डी र १० हजार खुद्रा रकम रहेको असई ललित साहले जानकारी दिए ।

जिल्ला प्रहरी कार्यालय रौतहटका प्रमुख एसपी रबीराज खड्काले उक्त रकम र मोटरसाइकल तस्करको हुन सक्ने बताएको छ ।

लकडाउनको समयमा लुकीछिपी भारतीय सामान खरिद गर्न जाने क्रममा प्रहरीलाई देखेर तस्कर समूह भागेको हुनसक्ने अनुमान रहेको एसपी खड्काले बताए ।