धनुषा प्रहरीद्वारा चोरी आरोपमा पक्राउ परेका एक युवतीसहित १३ जना सार्वजनिक

टुडेपाटी–
जनकपुरधाम, जेठ १८ गते ।

धनुषा प्रहरीले चोरी आरोपमा पक्राउ परेका एक युवतीसहित १३ जनालाई सार्वजनिक गरेको छ ।

चोरलाई समात्ने अभियान अन्तर्गत पक्राउ परेका थप १३ जनालाई बिहिबार जिल्ला प्रहरी कार्यालयमा पत्रकार सम्मेलनको आयोजना गर्दै उनीहरुलाई सार्वजनिक गरिएको हो ।

पक्राउ पर्नेमा १६ वर्षदेखि ३० वर्षसम्मका युवती तथा युवक रहेका छन् ।

प्रहरीले बजारमा सिक्री तान्ने, साइकल चोरी गरेको, मोटरसाइकल चोरी, मोटर चोरी, रड चोरीलगायतको चोरीको घटनामा एक युवतीसहित १३ जनालाई सार्वजनिक गरेको हो ।

प्रहरी उपरीक्षक विश्वराज खड्काले धनुषा प्रहरीले चोरलाई समात्न सञ्चालन गरेको अभियान अन्तर्गत यिनीहरुलाई नियन्त्रणमा लिएको बताए । उनले पक्राउ परेकाहरुमध्ये अधिकांशलाई चोरी गर्दै गरेको अवस्थामा नियन्त्रणमा लिएको जानकारी दिए ।