मधेश प्रदेश : नवजात शिशुको शव फेला

टुडेपाटी–
सर्लाही, कार्तिक १५ गते ।

सर्लाहीमा खोलाको किनारमा नवजात शिशुको शव फेला परेको छ ।

जिल्लाको ईश्वरपुर नगरपालिका ६, स्थित फूलजोर खोलाको किनारमा नवजात शिशुको शव फेला परेको हो ।

बयलवासबाट फूलजोर मन्दिर हुँदै रानिगञ्जतर्फ निस्कने सडकको खोला किनारमा बोराभित्र पोको पारेर फालेको अवस्थामा नवजात शिशु (छोरी) को शव फेला परेको जिल्ला प्रहरी कार्यालय सर्लाहीले जनाएको छ ।

प्रहरी प्रमुख प्रहरी उपरीक्षक प्रविण पोख्रेलका अनुसार मंगलबार बिहान फोहोर संकलन गर्ने बालबालिकाले बोराभित्र शिशुको शव फेला पारेपछि प्रहरीलाई खबर गरेका थिए ।

नवजात शिशुको शव पोष्टमार्टमका लागि प्रादेशिक अस्पताल मलंगवा पठाइएको र यस सम्बन्धमा थप अनुसन्धान भइरहेको उनले जानकारी दिए ।