मधेश प्रदेश : अटोरिक्साको ठक्करबाट सशस्त्र प्रहरी निरीक्षक घाइते

टुडेपाटी–
वीरगञ्ज, कात्तिक ५ गते ।

पर्सामा अटोरिक्साको ठक्करबाट सशस्त्र प्रहरीका प्रहरी निरीक्षक घाइते भएका छन् ।

जिल्लाको जिराभवानी गाउँपालिका स्थित अटोरिक्साको ठक्करबाट सशस्त्र प्रहरी बोर्डर आउट पोस्ट महादेवपट्टीका प्रमुख सशस्त्र प्रहरी निरीक्षक रमेश साख घाइते भएका हुन् ।

हात भाँचिएपछि उनलाई नारायणी बयोधा मेडिसिटी अस्पतालमा उपचारका लागि लगिएको छ ।

शुक्रबार राति इलाका प्रहरी कार्यालय सेढवा र सशस्त्र प्रहरी बलको बोर्डर आउट पोस्ट महादेवपट्टीले संयुक्त रुपमा सवारी साधन चेकजाँच गरिरहेकामा हुलाकी राजमार्ग अन्तर्गत जिराभवानी गाउँपालिका–२ दुई लाटोमाई मन्दिर नजिक चेक प्वाइन्ट राखिएको थियो ।

सोही क्रममा सुवर्णपुरबाट आउँदै गरेका ना २ ह १४५४ नम्बरको अटोरिक्सालाई सशस्त्र प्रहरी निरीक्षक साखले रोक्न खोजेका थिए । तर अटो रोकिएन, उनैलाई ठक्कर दियो ।

यता सशस्त्र प्रहरी बल नम्बर १३ गण हेडक्वार्टर पर्साका प्रवक्ता प्रहरी नायब उपरीक्षक सन्तोष बस्नेतले अटो चालकले मादक पदार्थ सेवन गरेका कारण दुर्घटना भएको जानकारी दिए ।