गठबन्धनले बहुमत ल्याए टिकट नपाएकाहरुका लागि धेरै अवसर छ : प्रचण्ड

टुडेपाटी–
जनकपुरधाम, कार्तिक ५ गते ।

नेकपा माओवादी केन्द्रका अध्यक्ष पुष्पकमल दाहाल प्रचण्डले गठबन्धनले बहुमत ल्याए टिकट नपाएका नेता तथा कार्यकर्ताहरुका लागि धेरै अवसर रहेको बताएका छन् ।

शनिवार जनकपुरधाममा पाँच दलीय गठबन्धनको प्रदेश स्तरीय कार्यकर्ता भेलामा बोल्दै पूर्व प्रधानमन्त्री समेत रहेका प्रचण्डले अहिले निर्वाचनमा टिकट नपाएकाहरुलाई असन्तुष्ट नहुन भन्दै गठबन्धनले बहुमत ल्याए उनीहरुका लागि धेरै अवसर रहेको बताए ।

प्रचण्डले भने, ‘गठबन्धनले बहुमत ल्याउनुपर्छ, यो संविधान, लोकतन्त्र, गणतन्त्र र राष्ट्रको निम्ति यो अनिवार्य हो । यस्तै बहुमत ल्याएपछि हामीसँग अवसर नै अवसर हुनेवाला छ’, उनले अगाडि भने, ‘अहिले चुनाव लड्न नपाएका, टिकट नपाएकामध्ये कयौँ साथी ठुला ठुला राजनीतिक नियुक्तीमा जान सक्नुहुन्छ । कयौँ राजदुत बन्नसक्नुहुन्छ, संवैधानिक नियुक्ती हुन सक्छ । राष्ट्रियसभामा जान सक्नुहुन्छ । यो नै अन्तिम हो । आकाशबाट झर्यो, धर्ति फाट्यो जस्तो भनेर सोँच्नुपर्ने अवाश्यकता छैन् ।’

गठबन्धन हारे मात्र धर्ति फाडेर जाने भन्दै पाँच दलिय उम्मेदवारलाई मत दिन आग्रह गरे ।