मधेश प्रदेश : बोलबम तिर्थयात्रीको ट्याक्टरबाट खसेर मृत्यु

टुडेपाटी–
जनकपुरधाम, साउन १३ गते ।

सर्लाहीमा बोलबम गइरहेका एक युवकको आफु सवार ट्याक्टरबाट खसेर मृत्यु भएको छ ।

जिल्लाको बागमती नगरपालिका–४, जिरायतमा शुक्रबार दिउँसो चक्रघट्टाबाट बागमतीतर्फ बोलबमका तिर्थयात्री बोकेर आउँदै गरेको नम्वर नुखलेको ट्याक्टरबाट खसेर सोही ट्याक्टरमा सवार चक्रघट्टा गाएँपालिका–६, गोहियाही बस्ने १९ वर्षीय निखिल चौधरीको मृत्यु भएको हो ।

ट्याक्टरको टेलरबाट अगाडिको भाग इन्जिनमा जाने क्रममा बीचमा लडी गम्भीर घाइते भएका चौधरीलाई उपचारका लागि सरस्वती अस्पताल हरिवन ल्याउँदा चिकित्सकले मृत घोषणा गरेका थिए ।

मृतकको शव पोष्टमार्टमका लागि प्रादेशिक अस्पताल मलंगवा पठाइएको छ ।

यता दुर्घटनापछि ट्याक्टर चालक ट्याक्टरसहित फरार भएका छन् । यस सम्बन्धमा थप अनुसन्धान भइरहेको सर्लाही प्रहरीले जनाएको छ ।