महोत्तरीमा काकाको हत्या गरेको आरोपमा भतिजो पक्राउ

टुडेपाटी–
महोत्तरी, साउन ६ गते ।

महोत्तरीमा आफ्नै काकाको हत्या गरेको आरोपमा भतिजो पक्राउ परेका छन् ।

पक्राउ पर्नेमा जिल्लाको पिपरा गाउँपालिका वडा नं. ५ सहोड़वाका ४५ वर्षीय रामनाथ दास रहेको जिल्ला प्रहरी कार्यालय महोत्तरीले जनाएको छ।

आँपको बगैँचामा सुतिरहेको अवस्थामा आफ्नै काका रामबहादुर दासलाई रामनाथले अनुहार र कन्चटसहित शरीरको विभिन्न भागमा कोदालोले प्रहार गरी हत्या गरेको प्रहरी प्रवक्ता डीएसपी प्रकाश विष्टले जानकारी दिए।

घटनापछि फरार रहेका रामनाथलाई जिल्ला प्रहरी कार्यालय महोत्तरी र इलाका प्रहरी कार्यालय सहोडवाको संयुक्त टोलीले सहोड़वा चाँदनी चोकबाटै पक्राउ गरेको थियो।

रामनाथ यस अघि पनि हत्या आरोपमा सजाय काटिसकेका छन् । करिब ३० वर्षअघि रामनाथले साविक सहोडवा गाविस–५ का रामविलास दास तत्मालाई कुटपिट गरी हत्या गरेको पछि कारागारमा थिए ।

केन्द्रीय कारागार त्रिपुरेश्वर काठमाडौँमा रहेका उनी गणतन्त्र दिवसको दिन छुटेका थिए।