सप्तरीबाट पौने २ क्वीन्टल गाँजासहित मिनी ट्रक नियन्त्रणमा

शुभ नारायण यादव –
सप्तरी, असार ८ गते ।

सप्तरीको हनुमाननगर कंकालिनी नगरपालिका वडा न. –१ स्थित कोशी ब्यारेजबाट सशस्त्र प्रहरीले मिनी ट्रक सहित अवैध गाँजा बरामद गरेको छ ।

पूर्व पश्चिम लोकमार्गबाट को.१ ख् २९२५ नम्बरको मिनी ट्रकबाट गाँजा सहित अदुवा शसस्त्र प्रहरीले नियन्त्रणमा लिएको हो ।

भारदह वेस क्याम्पबाट खटिएको शसस्त्र प्रहरी निरिक्षक किसमान तामाङ्ग नेतृत्वको टोलीले गएराति शंका लागेर चेकजाँच गर्न खोज्दा चालक र सह–चालक फरार भएका छन् ।

प्रहरी निरिक्षक तामाङ्गका अनुसार सो मिनी ट्रकबाट ७ पोकामा रहेको १ क्वीन्टल ७५ किलो गाँजा, अन्दाजी ३ सय ५० किलो अदुवासहित मिनी ट्रक नियन्त्रणमा लिएर जिल्ला प्रहरी कार्यालय सप्तरीलाई बुझाएको छ ।

फरार रहेका ट्रकका चालक र सह–चालकको खोजी भईरहेको जिल्ला प्रहरी कार्यालय सप्तरीका डिएसपी माधव प्रसाद काफ्लेले जानकारी दिए ।