जनकपुरधाम आउन लागेको विमानको यात्रुको साथबाट एक राउण्ड गोली बरामद

टुडेपाटी–
काठमाडौँ, असार १ गते ।

विमानबाट जनकपुरधाम आउन लागेकी एक यात्रुको झोलामा एक राउण्ड गोली भेटिएको छ ।

काठमाडौँबाट जनकपुरधाम आइरहेकी सर्लाहीको हरिपुर नगरपालिका–७ की ३६ वर्षीय किरणकुमारी सिंहलाई नियमित चेकजाँचका क्रममा गोली भेटिएपछि प्रहरीले पक्राउ गरेको छ ।

विमानस्थलको आन्तरिक उडानतर्फ प्रस्थान कक्षको ह्याण्ड ब्यागेज चेकिङ एरियाबाट उनलाई नियन्त्रणमा लिइएको विमानस्थल प्रहरीले जनाएको छ ।

बुद्ध एयरको उडानमार्फत सिंह जनकपुरधाम आउन लागेकी थिइन् । थप अनुसन्धान तथा कारबाहीका लागि उनलाई विमानस्थलबाट प्रहरी वृत्त, गौशाला पठाइएको छ ।