चोरीको मोटरसाइकलसहित वडाध्यक्ष प्रहरीको फन्दामा

टुडेपाटी–
काठमाडौं, बैशाख ८ गते ।

प्रहरीले चोरीको मोटरसाइकल सहित वडाध्यक्षलाई नियन्त्रणमा लिएका छन् ।

जाजरकोटको नलगाड नगरपालिका–१ का वडाध्यक्ष हिरालाल पुन चोरीको मोटरसाइकलसहित पक्राउ परेका हुन् ।

वैशाख ४ मा जाजरकोट नलगाड–१ कल्पतस्थित सडकमा सवारीधनी कागजात नभएको लु ५९ प ०२१७ नम्बरको १५० सिसिको पल्सर मोटरसाइकल राखेको सूचनाका आधारमा इलाका प्रहरी कार्यालय दल्ली जाजरकोटबाट खटिएको प्रहरीले मोटरसाइकल बरामद गरेको थियो ।

प्रहरी अनुसन्धानका क्रममा उक्त मोटरसाइकल नलगाड नगरपालिका–१ का वडाध्यक्ष हिरालाल पुनले चलाइरहेको खुलेको थियो ।

वडाध्यक्षलाई खोजतलासको क्रममा ६ वैशाखमा प्रहरी टोलीले फेला पारेको थियो । जाजरकोट जिल्ला अदालतबाट ७ दिनको म्याद थप गरी पुनमाथि थप अनुसन्धान भइरहेको छ ।

पक्राउ परेका वडाध्यक्ष अहिले प्रहरीको हिरासतमा रहेका छन् ।