धनुषा गोली हानी हत्या गरेको आरोपमा एकजना पक्राउ, दुईजना फरार

टुडेपाटी–
जनकपुरधाम, चैत २४ गते ।

धनुषामा आफ्नै साथीलाई गोली हानी हत्या गरेको आरोपमा एकजना पक्राउ परेका छन् ।

धनुषाको हँसपुर नगरपालिका–७ स्थित गहुँ खेतमा विजय रामको विभत्स तरिकाले हत्या गरि फ्याकेको अवस्थामा शव फेला परेको थियो ।

घटनाको एक दिन पश्चात प्रहरीले हत्यामा संलग्न रहेको भन्दै सोही स्थानका २० वर्षीय मनोज महरालाई पक्राउ गरेको छ । त्यस्तै हत्यामा संलग्न दुईजना फरार रहेको धनुषाका प्रहरी प्रवक्ता प्रहरी नायव उपरीक्षक जितेन्द्रकुमार बस्नेतले जानकारी दिए ।

विजय रामको शव फेला परेको घटना बारे प्रहरीलाई जानकारी भएसंगै अनुसन्धान सुरु थालेको थियो । सो घटनामा महरा सहित तीनजनाको संलग्नता रहेको खुलेको उनले बताए ।

प्रहरी निरीक्षक बिक्रम साहको नेतृत्वमा खटेको अनुसन्धान टोलीले घटनाबारे सुक्ष्म अनुसन्धान र विभिन्न व्यक्तिहरुसँग सोधपुछ गर्दा विजय राम मंगलवार राति ७ बजे ३ जना साथीहरुसँग घर बाहिर घुम्न गएको खुलेको थियो ।

शंकाको आधारमा महरालाई नियन्त्रणमा लिएर अनुसन्धान गर्दा १९ वर्षीय पंकज मण्डल, २२ वर्षीय जितु मण्डल मिलेर विजयलाई गोली हानी हत्या गरेको खुलेको प्रहरी नायब उपरीक्षक बस्नेतले बताए ।

उनीहरुले पुरानो रिसिबीको बदला लिने उद्देश्यले विजयको हत्या गरेको खुलेको प्रहरी नायब उपरीक्षक बस्नेतले बताए ।

पक्राउ परेका मनोजमाथि ज्यानसम्बन्धी कसूर (कर्तव्य ज्यान) मुद्दामा म्याद थप गरि अनुसन्धान गरिरहेको उनले बताए । यता फरार रहेका दुबै जनाको खोजतलास भइरहेको जिल्ला प्रहरी कार्यालय धनुषाले जनाएको छ ।