रौतहटमा भारतीय गाडीको ठक्करबाट एक महिलाको मृत्यु

टुडेपाटी-
रौतहट, फागुन २८ गते ।

रौतहटमा भारतीय गाडीको ठक्करबाट एक महिलाको मृत्यु भएको छ ।

बीआर ०५ पिए ५००० नम्बरको गाडीको ठक्करबाट गुजारा नगरपालिका–३ की ४० वर्षीय गीतादेवीको मृत्यु भएको हो ।

उनको घटनास्थलमै मृत्यु भएको प्रहरीले जनाएको छ ।

महिलालाई ठक्कर दिएलगत्तै आक्रोशित स्थानीयवासीको भीडले गाडीमा आगजनी गरेका छन् । गाडी पूर्णरुपमा जलेर नष्ट भएको इलाका प्रहरी कार्यालय चन्द्रनिगाहापुरका प्रमुख लिलाराज लामिछानेले बताए । उक्त गाडीको ठक्करबाट अर्की एक महिला घाइते भएकी छन् ।

जथाभावी चलाइएको उक्त गाडीको ठक्करबाट थुप्रै खसी बाख्रा मरेको प्रहरीको भनाई छ ।

स्थानीयवासीका अनुसार गुजाराको पशुपति टोलमा भएको एक विवाह कार्यक्रममा आएका जन्तीले मदिरा सेवन गरेर गाडी चलाउँदा सो दुर्घटना भएको हो । घटनाबारे थप अनुसन्धान भैरहेको प्रहरीले जनाएको छ ।