ट्रकले मोटरसाइकललाई ठक्कर दिँदा महोत्तरीमा श्रीमानको मृत्यु, श्रीमती घाइते

टुडेपाटी–
जनकपुरधाम, फागुन २५ गते ।

महोत्तरीमा मोटरसाइकललाई ट्रकले ठक्कर दिँदा एकजनाको मृत्यु भएको छ भने एकजना घाइते भएकी छिन् ।

ट्रकको ठक्करबाट मोटरसाइकल सवार महोत्तरीको गौशाला नगरपालिका वडा नं. २ निगौलका ४० वर्षीय रामपुनित ठाकुरको मृत्यु भएको जिल्ला प्रहरी कार्यालय महोत्तरीले जनाएको छ । त्यस्तै उनको श्रीमती घाइते भएकी छिन् ।

बुधवार दिउँसो औरही नगरपालिका–४ स्थित माईस्थान सम्सी सडक खण्डमा गौशालाबाट सम्सी तर्फ जाँदै गरेको प्र २–०२–००३ प ५१५९ नम्बरको मोटरसाईकल र बिपरित दिशा तर्फ बाट आउँदै गरेको ना ५ ख ७७२७ नम्बरको ट्रक एकआपसमा ठक्कर खाएको थियो ।

दुर्घटनामा घाइते भएका ठाकुरको प्रादेशिक अस्पताल जनकपुरधाममा उपचारको क्रममा मृत्यु भएको प्रहरी प्र्रवक्ता प्रहरी नायव उपरीक्षक प्रकाश विष्टले जानकारी दिए ।

त्यस्तै मोटसाइकलको पछाडी सवार मृतकका श्रीमती ३८ वर्षीया उर्मिला ठाकुर घाईते रहेको र प्रादेशिक अस्पताल जनकपुरमा उपचार भईरहेको, प्रहरीले जनाएका छन् ।