मधेश प्रदेश : दुर्घटनामा एक जनाको मृत्यु

टुडेपाटी–
रौतहट, माघ २७ गते ।

सवारी दुर्घटनामा परेर रौतहटमा एक जना पुरुषको मृत्यु भएको छ । नम्बर नखुलेको गाडीले ठक्कर दिँदा एक जना पुरुषको मृत्यु भएको हो ।

बिहिबार विहान करिब साढे ४ बजेको समयमा गौर चन्द्रपुर सडक खण्डमा जिन्गडिया चोक नजिकै गाडीको ठक्करबाट नाम थर, वतन नखुलेको अन्दाजी ५०–५२ वर्षका पुरुष घाइते भएका थिए ।

घाइते पुरुषको उपचारको क्रममा अस्पताल लैजाँदै गर्दा मृत्यु भएको ईलाका प्रहरी कार्यालय गरुडाका प्रमुख डीएसपी श्रीराम भण्डारी जानकारी दिएका छन् ।

मृतकलाई पोस्टमार्टमको लागि गौर अस्पतालमा पठाईएको डीएसपी भण्डारीले बताए ।

ठक्कर दिएर भागेको सवारी साधनको खोजतलास भइरहेको छ । साथै, मृतकको पहिचान गर्नको लागि प्रहरीले स्थानीयसँग सहयोगको अपिल गरेको छ ।