जनकपुरधामको रंगभूमी मैदानको मर्मत सम्भार हुँदै

दिपक मिश्र–
जनकपुरधाम, माघ १७ गते ।

जनकपुरधामको एतिहासीक रंगभूमी मैदान (बाह्रविघा) को मर्मतको काम सुरु भएको छ । खेललाई लयमा ल्याउनका लागि मैदानको मर्मत सम्भार थालिएको हो ।

कोरोना महामारी आएपश्चात जनकपुरधाममा दुई वर्षयता कुनै राम्रो प्रतियोगिता हुन सकेको छैन ।

मधेश प्रदेश क्रिकेट संघ (क्यान) का अध्यक्ष हिरा भगतले खेल मैदान बनेलगत्तै धमाधम घरेलु प्रतियोगिता आयोजना हुने जानकारी दिए । फागुनमा इन्टर स्कुल क्रिकेट प्रतियोगिता र चैतमा महेन्द्र नारायण निधि कप हुने उनले बताए ।

जिल्ला क्रिकेट संघ धनुषाका अध्यक्ष शोभाकान्त पाण्डेले क्रिकेटलाई पुनः लयमा ल्याउने उद्देश्यले दुई वर्षपछि मैदानको मर्मत सम्भार हुन लागेको बताए । उनले मुख्यतः महेन्द्र नारायण निधि कपका लागि खेल मैदान तयार भइरहेको बताए ।

मर्मत सम्भारमा करिब पाँच लाख रकम खर्च हुने अनुमान गरिएको छ । महेन्द्र नारायण निधि कपमा भारतको दुई, सातै प्रदेश र तीन विभागीय टिम सहभागी हुने छन् ।