महोत्तरीमा लागूऔषध गाँजासहित एकै परिवारका ४ जना प्रहरीको फन्दामा

टुडेपाटी-
महोत्तरी, पुस २१ गते ।

महोत्तरीमा लागुऔषध गाँजासहित एकै परिवारका ४ जना पक्राउ परेका छन् । गौशाला नगरपालिका-४ रजखोरबाट उनीहरूलाई प्रहरीले पक्राउ गरेका हुन् ।

पक्राउ पर्नेमा गौशाला नगरपालिका–४ रजखोर बस्ने ७० बर्षिय रामचन्द्र साह, उनको ५० बर्षिय छोरा उपेन्द्र साह, २१ बर्षिय राेहित साह र १८ बर्षिय बिबेक साह रहेका छन् ।

लागुऔषध गाँजा कारोबार गरिरहेको भन्ने विशेष सूचनाको आधारमा मंगलवार साँझ इलाका प्रहरी कार्यालय गौशालाका प्रहरी निरीक्षक विष्णु प्रदिप बस्यालको कमाण्डमा खटिएको प्रहरी टोलीले उनीहरुको घरको खानतलासी गर्दा ८ केजी गाँजा बरामद भएको महोत्तरीका प्रहरी प्रवक्ता तथा डीएसपी प्रकाश विष्टले जानकारी दिए ।

उनका अनुसार खानतलासी गर्दा रामचन्द्रको घरबाट बिक्रीको लागी पुरिया बनाई राखेको तयारी गाँजा ३ केजी, डिजिटल तराजु एक थान र गाँजा बिक्री गरेकोे जम्मा नगद एकहजार १ सय रुपैया बरामद गरी रामचन्द्र र उनका १८ बर्षिय नाती रोहितलाई पक्राउ गरिएको हो ।

यस्तै रामचन्द्रको छोरा उपेन्द्र साहको घरबाट बिक्रीको लागि पोका बनाई राखेको तयारी गाँजा ५ केजी, डिजिटल तराजु एक थान र गाँजा बिक्री गरेको नगद ६ हजार ५ सय रुपैयाँ बरामद गरी उपेन्द्र र उनका १९ बर्षिय छोरा बिवेक साहलाई पक्राउ गरिएको उनले बताए ।

पक्राउ परेका उनीहरुमाथि लागुऔषध मुद्दामा थप अनुसन्धान अगाडि बढाइएको महोत्तरी प्रहरीले जनाएको छ ।