सिरहामा युवकलाई छुरा प्रहार गरी हत्या गरेको आरोपमा ५ जना पक्राउ

टुडेपाटी–
जनकपुरधाम, पुस ७ गते ।

छुरा प्रहार गरी हत्या गरेको आरोपमा सिरहामा ५ जना पक्राउ परेका छन् ।

पक्राउ पर्नेमा जिल्लाको गोलबजार–२ का २२ वर्षीय भुवन प्रसाद महतो, वडा नं. ६ का १९ वर्षीय श्रवण कुमार मण्डल, २० वर्षीय कालु भन्ने रोहन विश्वकर्मा, १८ वर्षीय सौकात खान र १९ वर्षीय धर्मेन्द्र यादव रहेको जिल्ला प्रहरी कार्यालय सिरहाका प्रहरी प्रवक्ता सुवास बुढाथोकीले जानकारी दिए ।

गत शनिवार राति करिब साढे ८ बजे गोलबजार नगरपालिका वडा नं. ६ मा दुई समुहबिच विवाद भएको थियो । सोही विवादमा दिपक साह लगायतका समुहले छुरा प्रहार गरेपछि वडा नं. ६ डोहटियाका २६ वर्षीय राम कुमार सदा र रिकेश सदा घाइते भएका थिए ।

घाइतेहरुलाई भूमिजा अस्पताल गोलबजार लगेकोमा थप उपचारको लागि आर.के. मेडिसिटी अस्पताल धनगढी लगेकोमा उपचारको क्रममा राम कुमार सदाको मृत्यु भएको र रिकेश सदाको उपचार भईरहेको प्रवक्ता बुढाथोकीले जानकारी दिए ।

शनिवार गोलबजार–६ स्थित लक्ष्मी मन्दिर देखि पश्चिम तर्फ जाने सार्वजनिक बाटोमा हो–हल्ला गर्दै आफ्नो घरतर्फ जादैं गरेको राम प्रसाद सदा लगायतको समुहलाई दिपक साह लगायतको समुहले किन हो–हल्ला गरेको ? हल्ला नगरी आफ्नो घर जानु भने पश्चात विवाद भई झगडा भएको थियो ।

घटना पश्चात स्थानीयहरुले आन्दोलन गर्दै राज्यमार्ग आवरुद्ध गरेका थिए । सोही प्रदर्शनको क्रममा प्रहरी तथा स्थानीयहरु घाइते भएका थिए ।