बस र मोटरसाइकल ठोक्किँदा धनुषामा एक जनाको मृत्यु

टुडेपाटी–
जनकपुरधाम, पुस १ गते ।

धनुषामा बस र मोटरसाइकल एकापसमा ठोक्किँदा एकजनाको मृत्यु भएको छ ।

बसको ठक्करबाट मोटरसाइकल चालक उदयपुरको कटारी नगरपालिका वडा नं. ७ का २७ वर्षिय विकास विश्वकर्माको मृत्यु भएको इलाका प्रहरी कार्यालय ढल्केवरका प्रहरी निरीक्षक प्रदिप सुवेदीले जानकारी दिए ।

बिहिवार जिल्लाको मिथिला नगरपालिका वडा नं. १० लालगढस्थित पूर्व–पश्चिम लोकमार्गमा पूर्वबाट नेपालगञ्जतर्फ जाँदै गरेको बा ६ प २५५९ नम्बरको बस र विपरित दिशाबाट आउँदै गरेको बा ५९ प ६८८९ नम्बरको मोटरसाइकल एकापसमा ठोकिएको थियो । दुर्घटनामा विश्वकर्माको घटना स्थलमै मृत्यु भएको प्रहरीले जनाएको छ ।

बस र बसचालक प्रहरी नियन्त्रणमा रहेको तथा शव पोष्टमार्टमका लागि प्रादेशिक अस्पताल जनकपुरधाम पठाइएको इलाका प्रहरी कार्यालय ढल्केवरले जनाएको छ ।