उपचार खर्च तिर्न नसकेर अस्पतालको बन्धक बनेका मण्डलले गरे आत्महत्या

टुडेपाटी–
विराटनगर, मंसिर १० गते ।

उपचार वापतको रकम तिर्न नसकेर अस्पतालको बन्धक बनेका एकजनाले आत्महत्या गरेका छन् । विराटनगरस्थित गोल्डेन अस्पतालबाट हामफालेर आत्महत्याको प्रयास गर्ने ३५ वर्षीय शिवकुमार मण्डलको मृत्यु भएको छ ।

मोरङको धनपालथान गाउँपालिका वडा न. १ का मण्डलको उपचारका क्रममा आज मध्यान्ह मृत्यु भएको हो । मण्डलले आज बिहान ६ बजे सोही अस्पतालको तीन तलामाथिबाट हामफालेर आत्महत्याको प्रयास गरेका थिए । अस्पतालबाट हामफालेर गम्भीर घाइते भएका मण्डलको सोही अस्पतालमा उपचारको क्रममा मृत्यु भएको प्रहरीले जनाएको छ ।

जिल्ला प्रहरी कार्यालय मोरङका प्रहरीका प्रवक्ता प्रहरी नायव उपरीक्षक दीपक श्रेष्ठका अनुसार मण्डल छारे रोगको पुरानै समस्या रहेका मण्डललाई उपचारका लागि मंसिर ३ गते परिवारले अस्पताल भर्ना गरेका थिए ।

आइसियुमा राखेर उनको उपचार भएको थियो । अस्पतालले मण्डललाई मंसिर ७ गते डिस्चार्ज दिएको थियो । तर उपचार वापतको १९ हजार रूपैयाँ तिर्न नसक्दा परिवारका सदस्यले घर लैजान पाइरहेका थिएनन् ।

उपचारमा लागेको मध्ये १७ हजार रूपैयाँ मात्रै परिवारले तिर्न सकेपछि मण्डललाई अस्पतालले बन्धक बनाएर राखेको परिवारजनको दाबी छ ।