दीपावलीको राति ट्याक्टर सोरुममा आगलगी हुँदा लाखौँको क्षति

टुडेपाटी-
सर्लाही, कार्तिक १९ गते ।

दीपावलीमा बालिएको दियोबाट ट्याक्टर सोरुममा आगलगी हुँदा लाखौँको क्षति भएको छ । सर्लाही जिल्लाको बयलवासमा लक्ष्मीपूजा गर्न बालिएको दियोबाट ट्याक्टर सोरुम रहेको घरमा आगलागी हुँदा लाखौँको धनमाल जलेर नष्ट भएको प्रहरीले जनाएको छ ।

गएराति करिब १ बजे ईश्वरपुर नगरपालिका वडा नं. ७ बयलवास बजारस्थित ब्रहमबाबा चौकमा रहेको श्याम मैनालीको काठ र टायलले छाएको दुई तले घर पूर्णरुपमा जलेको छ भने सोही घरको तल्लो तलामा मिथिलेस महतोले संचालन गरेको मिनाक्षी टे«डर्स ट्याक्टरको सोरुममा क्षति पुगेको प्रहरीले जनाएको छ ।

आगलागीमा सोरुमभित्र रहेको सुपर न्यू होलैन्ड ३६३० मोडेल नम्वरको एउटा ट्याक्टर र सोरुमका अन्य पार्टपूर्जा पूर्णरुपमा जलेर नष्ट भएको छ भने अर्को ट्याक्टरमा आंशिक क्षति पुगेको प्रहरीले जनाएको छ ।

इलाका प्रहरी कार्यालय केशरगन्जका प्रहरी निरीक्षक जनकराज ढुङ्गानाले प्रारम्भिक विवरण अनुसार आगलागीबाट घर र ट्याक्टर सोरुममा गरी करिव ५५ लाख रुपियाँ बराबरको क्षति भएको जानकारी दिए ।
आगो स्थानीयवासी, प्रहरी र हरिवन तथा मलङ्गवा नगरपालिकाबाट आएको दमकलको सहयोगमा नियन्त्रणमा लिइएको थियो ।