छिमेकीको मलामी गएका बैठा बागमती नदीमा नुहाउन जाँदा बेपत्ता

टुडेपाटी-
रौतहट, असोज १९ गते ।

रौतहटस्थित बागमती नदीले बगाउँदा एकजना बेपत्ता भएका छन् ।

छिमेकीको मलामी गएको बेला नदीमा पौडिन पसेका माधवनारायण नगरपालिका–६ माधवपुरका ५० वर्षीय गंगाराम बैठा बेपत्ता भएको हो ।

प्रहरीका अनुसार पिपरा रजवाडास्थित बागमती घाटमा आफ्ना छिमेकीको मलामी गएका बैठा नदीमा नुहाउन पसेका थिए । केही दिनदेखि भएको वर्षाका कारण बागमतीमा पानीको बहाव उच्च छ ।

नुहाउन पसेको बेला पानीको भेलमा परेका बैठाको खोजी कार्य भइरहेको रौतहटका प्रहरी उपरीक्षक विनोद घिमिरेले जानकारी दिए ।